هناك أمور تحدث في مجالس النساء قد نعاني منها .. هنا سنتطرق الى بعض منها
لعلنا نخرج بفائده من طرح هذه السلوكيات للنقاش ..
الفكرهـ العامه :-
بعض السلوكيات التي نعاني منها في مجالس النساء ..
الأفكار الرئيسيه :-
(1) : تخيلي نفسك جالسه مع وحده وتسولفين وأنتِ متحمسه ماتدرين إلا أختنا في الله
قامت وخلتك " راحت تهاوش عياله" ..
(2) : أو .. وأنتِ تتكلمين ومتحمسه تقولين قصه او سالفه قالت وحده ابد ما أصدق مستحيل
وراه ماسوت كذا وليش صار كذا وتقطع سالفتك وتقعد تحلل ليش ماصار كذا وليش وليش ...
(3) : أو .. تتكلمين على وحده ماتدرين الا قاطعه سالفتك وتكلم وحده ثانيه يافلانه تخبرين ذيك
البلوزه اللي شريته انا وياك ترا رجعته صارت صغيره علي ( ويبدن في سالفه جديده متناسيات
سالفتك !! واقهرااااااااااااااااااه) ..
(4) : ومن الأمور اللي نعاني منها .. انك تكلمين وحده مب معطتك وجه ... أو تقعدين تسولفين
وماتدرين الا هي تقولك هاه وشو ماسمعتك عيدي !!
(5) : كلش عاد ولا ......
-1 - سواليف بعض الحريم الله يهديهن :-
*شفتي فلانه جابت شغاله .. ترد الثانيه : وش تبي به ؟ ماعنده الإ بزر !.. أكيد حامل !! ..
*وراك تأخرتي مهب عادتك !! ..ترد : دينمونا خرب وهواش انا وعيالي لين جابوا عامل يصلحه ..
* ياويلي فلانه حامل بنتها توه صغيره ماكملت 4 شهور .. ترد الثانيه : مسيكينه ورا مااكلت مانع !!
* واذا اعرست وحده يبدون كل ماشافوا امه فلانه مارزقه الله !!
* أعوذ بالله من هالعيال مكسفين بي بهالدراسه انبح حلقي وانا اهاوش وكني اكلم جدران ..
* واذا شافوا بزر صغير قالوا له : قل لماما تجيب لكم دادا .. " لقافه بهم شدخلهم )"!!
* واذا وحده نحفت عقب مااعرست قالوا اكيد مهب مرتاحه مع رجله ..
* إذا وحده مادخلت جامعه كل ماشافوها .. ورا ماتدرسين ؟ ماتملين من جلسة البيت ؟ ادخلي
معهد ..
والا بعض الحريم "أو البنات" إلا غصب بتسلوف ... رحت المستشفى وانا امشي شفت
عجوز شكله مهب سعوديه ومعه شغالته سوت كذا وكذا بعدين دخلت على الدكتوره وقالت
لي كذا وكذا ثمن طلعت وركبت السياره ومرينا البقاله وشرينا كذا وكذا ثم رجعنا البيت ولقيت
.... الخ " تقول كل شيء بالتفصيل الممل لين تصدع براسك تناسوا أن (خير الكلام ماقل ودل )
وأنا دايم اقول لأهلي ماكل مايُسمع ويُرى يُقال .. "
*والا بعضهم الله يهديهم تسألها وحده ماحملتي تقولها لا الله يرزقنا ..ماندري الا بعد 3 شهور
الا هي والده !!..
* واذا زارو موظفه في بيتها ورجعوا .. يبدون بالحش .. شفتي بيتها شلون هذا وهي موظفه
اجل حنا وش نقول !! .. ( حتى ولو كانوا هم أغنى منها ) ..
* وإذا وحده ماتوفقت مع زوجها وتطلقت يموتون لين يعرفون سبب الطلاق ويطلعون لك انواع
الإشعات .. .... الخ
-3- سواليف حريم يكرهونها أغلب البنات :-
* سواليف الحمل والولاده لين مايخلون الوحده تخاف وترتعب ...
* كثرة شكوى الزوجات من أزواجهن عند البنات لين مايتعقدون من العرس ...
* لاجلستي مع وحده تتوحم وتبدا تتشكى , لدرجة تحسين انك تبدين تتوحمين معه ...
* فلانه الى الحين مااعرست .. فلانه تأخرت ماحملت .. فلانه متهاوشه مع رجله .. . الخ
* واذا اجتمعوا مجموعة حريم وبدوا يسولفون بأشياء محرجه جدا وحساسه عند البنات واخزياه
( بعض الحريم الله يهديهن اذا اعرست غسلت وجهه بمرق )
- 3 - سواليف بعض البنات الله يهديهن :-
* تلقين كل وحده ماسكه جوالها ويبدن يرسلون بلوتوث .. عطيني هذا واعطيك هذا لين تطفشين
من جلستهم " لدرجة اني اتمنى ان الجوالات غاليات زي قبل او ان البلوتوث بفلوس كل مارحت
لمكان ماعندهم إلا سالفة الجوالات طيب يتكلمون فيها شوي مب طول الوقت "
*واللي عندها نت بالمنتديات والمواقع وصار وماصار ..
* والسمراء تبي خلطات تفتيح للبشره .. والبيضا تبي تسمير .. واللي تبي خلطات للشعر
واللي تبي لليدين ... الخ
* وبعضهن يمسكون الطبخات عندي لكم حلا جديد .. وش طريقة السلطه اللي ذاك اليوم ..
* والملتزمات شفتي البرنامج الفلاني .. شفتي شريط كذا انشودة فلان تجنن .. ويبدون يطلعون
إشاعات عن المذيعين والمنشدين ..
والعاديات شفتي المسلسل الفلاني الممثله فلانه .. الأغنيه الجديده لفلان تهبل
وفستان المطربه فلانه في حفلتها الأخيره يجنن ... الخ وكذلك يبدون في إطلاق الشائعات
بتقولون اجل وش نسولف عنه !!
انا قصدي انهم لامسكوا سالفه ماتركوها
يعني بنات خالاتي وبنات جيراننا ماعندهم غير سالفة الجوالات .. نروح ونجي وسالفتهم
عطيني واعطيك وجهاز كذا احسن والشركه ذيك نزلت موديل جديد ..... الخ
وأختي ومرة اخوي نروح ونجي وسالفتهم الخلطات والمنتديات ...
وأختي وبنت جيراننا .. الطبخ ..
وخالاتي كل وحده تتشكى من عياله ..
مافيه تغيير .. مافيه تنويع في السواليف لامسكوا سالفه ماتركوها (فهمتوا قصدي !!)
طيب مالمانع اننا شوي نتكلم عن الجوالات وشوي عن الطبخ وشوي عن المنتديات
وشوي عن القنوات والباقي سواليف عاديه .. ليش مانرتقي بسواليفنا ؟! ليش مانترك اللقافه ؟!
الى متى وحنا مانهتم الا بصغائر الأمور !! .. يعني الحين ماشاء الله صار عندنا قدر لابأس به من
المعلومات أغلب البنات مثقفات مو زي قبل .. حتى الحريم الكبار اللي مايقرون ولا يكتبون
زاد وعيهم وزادت ثقافتهم بسبب وسائل الإعلام وغيرها ..
ليش مانخلي سواليفنا شامله ... عن الطبخ والجوالات والنت و...... الخ ونتبادل خبرات
ومعلومات سواء كانت دينيه او ثقافيه او اجتماعيه او ..... الخ ...
ليش بدل القيل والقال مانخرج من جلستنا بفائده ولو كانت بسيطه ؟!! ..
الخلاصه ( تعلمي فن الكلام) :-
* تعلمي فن الإستماع .. وتراه يصغي للحديث بقلبه ** وبسمعه ولعله أدرى به
* تكلمي بما يعجب الطرف الآخر وليس بما يعجبك ..
* احفظي كرامة الآخرين إذا تكلمتي أو مازحتي .. ولا تمازحي بيدك فإن هذا لايليق ..
*ابتسمي ..
* اعلمي ان النفس لاتقبل الحديث الجاف ولا القاسي ( وادع الى سبيل ربك بالحكمة والموعظة
الحسنة ) وقال : ( ولو كنت فظاً غليظ القلب لانفضوا من حولك ) ..
*إياكِ والعجله لانها أم الندامه لأن صاحبها يقول قبل أن يعلم .. ويجيب قبل أن يفهم ..
* إذا عجزتِ عن حُسن الكلام فعليكِ بحسن الصمت ..
إذا كنت عن أن تُحسن الصمت عاجزاً ** فأنت عن الإبلاغ في القول أعجز
يخوض أُناس في الحديث ليوجزوا ** وللصمت في بعض المقالات أوجز ..
* أجمل وأعظم شعور هو إدخال الفرحه على قلب امرءٍ مسلم .. أسعدي الآخرين كوني متفائله
لا تثبطي من عزائم الناس ..
* احترام الطرف الآخر , الإهتمام بحديثه , أن لاتقطعين حديثه ..
*من الأدب أن لاتكذبين جليستك حتى لا تحرجينها ولاتظهرين ذلك بأي شكل ..
* فن الانتقاد : حاولي تجنب النقد وإن كان لابد فابدأي بنفسكِ قبل الآخرين وتجنبي النقد او
لنصيحه علناً .. تعهدني النصيحة في انفراد ** وجنبني النصيحة في الجماعة ..
* احفظي الأسرار ( اللي يقهر تقولين لوحده كلام وبعدين تقولين لاتقولينه لااحد وتروح هي
وتقول الكلام لوحده وتقول له بيني وبينك وعارفه انه مهب طالع وهكذا كل وحده تقول للثانيه
نفس الكلام لين ينتشر السر !! ) ..
معاني المفردات :-
قامت وخلتك : أي نهضت وتركتك ..
وراه : لماذا ؟
تخبرين : تذكرين ؟
دينمونا : دينمو الماء حقنا ..
فلانه مارزقه الله : أي ماحملت ؟
مكسفين بي : متعبيني ..
انبح حلقي : عورني حلقي وراح صوتي ..
دادا : طفل ..
ثمن : بعدين ..
لين : حتى ..
واخزياه : واعيباه .. وافشلتياه ..
الواجب :-
على كل عضوه تقرا الموضوع ان تشاركينا برأيها ونكون لها من الشاكرين ..
س 1: هل تعانين مثلما أعاني ؟! .. اكتبي لنا معاناتك إن وجدت ..
س 2 :مامعنى الكلمات الآتيه :- لين , ثمن ؟!
س 3 : اكملي الفراغ التالي "عشان أتأكد إنكم قريتوا الموضوع كامل
( بعض الحريم الله يهديهن اذا اعرست .......... )
من الكتاب
س 15 ص 108 فقرهـ ب , ج , هـ
يا الله حنيت للمدرسه تهي تهي ..
"ودمتم على طاعة الله
11-08-2008, 05:26 PM
أعاني .. فهل تعانين مثلما أعاني ؟!! 
سبحااان الله وبحمده **سبحاان الله العظيم 
