قصتي مثل الحلم (صورة قروي أول مرهــ ينام على سرير ومثقل الأكل وما صحا إلا على صوت صقعته بالبلاط و بصعرور كبر البيضة كل ماله يزيد بجبهته)

تخرجت من احد التخصصات العلمية بتقدير ممتاز بدون مرتبة شرف ,, بسبب حملي لمادهــ بأخر ترم لي بالكلية ,, وبكذا فقدت حِلمي بتكملة دراستي واخذي للدكتوراهــ

عمري ببداية قصتي 22 سنه جالسه ببيتنا عقب التخرج لا شغله ولا مشغله مغير نايمه وإذا صحيت ارجع أنام وبين النومــــه و النومــــه اخذ لي غفــــوة وإذا كلش مليت وتعبت أروح لأقرب جلسه بالصاله وانسدح إلا ما تلاحظون بموجة هـ البرد الواحد ياكافي ماودهــ يبعد عن البطانيات شبر ؟؟!! ــ ماعرف له إلا الي عندهــم دفايــــة بشريه ,, بس المشكلة هي المشكلة ,, كثرة السباحة تجيب البرد ـــ إلا بعد ما لاحظتوا مثلي إن أغلبية البنات ببيوت أهلهن شعرهن طويل ومتى ما أعرسن يبدأ ينعـــرم هـ الشعر و يقصر شوي شوي لحد ماياصل فوق أذانه؟؟؟!!! << سمعت إشاعة مفادهــ الشعر القصير أسرع بالغسل والتجفيف خاصة إذا تحولت الفتاه من آنســــــــة لـــ (سمكه) وصارت تداوم دوام رسمي بالحمام حتى إنه من زود الوسوسة تتسبح كذا مرهــ باليوم)

قدمت على مدارس أهليه وبعد واسطات وحب خشوم قبلون

اشتغلت وكرفت كرف حمير بعـــقــــد مكتوب فيه اجري 1500 ريال

و بالصدق استلم بأخر الشهر 1200 ريال فقط لا غير

125 ريال يروحن لتأمينات وباقي الـ 300 ما ندري وين يروحن!!!! (على طاري الراتب يااااازين من اشتغل خدامه بجنسية فلبينية << طراهــ هــ الفكرة تدور بمخيخي له فترهــ)


درّست عندهم سنة مع الشغل والنفاذ وواجهت أنا وزميلاتي السعوديات ضغوطات

بداية من الطالبات إلي ينفخن بحجة إنهن يكدن علينا (صورهــ مصري يقول : الله ياحمادهــ دا لحــــم كتافك من خيري< ياشين ألي ثقافتهم مسلسلات)

و مديرة كل يوم تمسكنا مهام جديدة ,, مرهــ إرشاد ومرهــ نشاط ومرهــ دروس تقويه وأحيان كلهن ,,, هذا غير أنصبتنا الكاملة ,,, وعاد مـــاودي أجيب لكم طاري الموجهات

أما الأدهى و الأمر إن زميلاتنا الأجنبيات يتمتعن بامتيازات "انصبه حصص اقل ,, وراتب أعلى هذا غير البدلات" بحجة إن الأجنبية دايمــــه لهم ,, والسعودية بأي لحظة يمكن يجيه تعيين رسمي وتتركهم

مرت هــ السنة بالطول والعرض وبعدهــ طابت نفسي ,, و قلت سنه خبرهــ تكفي لان بسبة هــ المدرسة صرت زبونه مداومة للمستشفيات لتعديل ضغطي ,,, بعدهــ قعدت بالبيت على أمل يجين "تعيين رسمي" ,,, وحتى لـــــو "بدل استثناء" أو "بند" محنب عايفين (يمديتس تقولين ياليــــل مطولك << طراهــ وحدهــ من قريباتي تحلف إن المدرسات ألي يدّرسن معه من زمن جدي وإلى الحين يستعملن الديرمانة إذا بغن يكشخن و أصغرهن له فوق 28 سنه خدمة تدّريس وما عندهن نية يتقاعدن"تعرفون الأولين مشكوك بمصداقية أعمارهم")

انتظرت سنه بالبيت أحتري خبر التعيين , لحد ما تخللت من القعدة وجان بواسير ,, حتى من البطى وألفتـــــن(مأخوذة من ألألفه) عنكبوت وبنت له بيت بيني وبين الجدار

سمعت عن الإبتعــــاث للخارج لتكمله التعليمورجع لي حلمي القديم وتخيلت نفسي بمكان الدكتورة ناهـــــد ألي رسبتن بذيك المادة و اغتالت حلمي الوليد (على طاري المواليد الوحدة ياكافي من تالي تخاف تحمل مب علشان الطّلق و ألامه والكّرب وانه سكرهــ من سكرات الموت لاااااا , بناتنا صارن يفكرن بموضوعيه بهالشي وانه فترهــ الـــم جسدي ويروح , لأكنهن التفتن لأشياء أهم وبدن يضربن أخماس بأسداس ويتوقعن هل يروحن هالمرة ضحية خطاء طبي؟؟!!! أو تبديل بين المواليد؟؟؟!!! أو ربما اختطاف لوليدهن ؟؟؟!!! أو.... أو.... أو ,, ومن ثم تنتهي معاناته أو بالأصح تبتدي بمجرد خبر بجريدهــ وسالفة يتناقله الناس ,, وعاد دوروا له نهاية أو حل )


نرجع لاسمي عفوا أقصـــــد حلمــــــــي

قريت الخبر من هنا وبعدهــ قعدت اخطط لسفرتي ودراستي , عاد يا ســــــــــلام

"بـــــلاد متفتحة وبقمة التقدم والرقي ,,, بـــــلاد هي منبع الحــــــرية" <= ياشين الي يفهمون هـ الحرية غلط.

"وقلت بنفسي يابنت قدمي منتب خاسرتن شي"

طلبوا من أوراق لازم أخلصهن ,,, خلصتها كلها وقدمتهن ... لاكن بقي أهم شي ألا وهو المحرم


أبوي رجال كبير ومايقدر يسافر واكبر إخواني العيال عمرهــ 15 سنه يعني ماينفع

ومحد من خوالي ولا عمومتي يقدر يروح معي لان كلن لاهي بحياته وعيالهــ

قلت ما فيه إلا إني المـــح بين أهلي وناسي " ودي بواحد أتزوجه يروح معي يدرس"

بس مالت عليهم لا تلميح نفع ولا حتى التصـــــريح

أخر شي جتن فكرهــ مفادهــ ,, وراي ما ادور بنفسي ؟؟؟ (وصدق من قال ماحك جلدك مثل ظفرك)

والتجأت للنت لحل مشكلتي

دخلت مواقع خاصة بالـــــزواج


.............................. ..يتبع

تاااااابع..................... ..................


نزلت فيها إعــــــــــلان محتواهــ



[ أنا شابه سعوديه أبي أعرس زواج مســــفــــار

عمري 23 سنه (لحد يحسب وراي ,,, وبعدهــ يتذيهن ويقول خطاء عليتس عمرتس الحين 24 ,,, لأني ابرد عليك يالملقوف ماعمرك سمعت إن البنت يوقف عمرهــ عند حد معين ولاعاد يـــزود؟؟؟)


وشرطي بزوج المستقبل

"ظل راقل ولا ظل حيطة"

و"الجــــــود بالمــــاجــــود "

فمن توفرت به هذهــ الشروط يسارع بمراسلتي على هذا الإيميل أو إضافتي ........@...........

:+: مميزات زواج المسفـــار :+:


1ـ تراك محفول مكفول من زواجك لسفرك لرجعتك مرتن ثانيه لبلدك يعني مافيه شقه ولا أثاث يقصمن ظهرك

2ـ إذا عندك نية تدرس فخير وبركه ,وبعد نرجع نؤكد ونقول انك محفول مكفول .

ـ عهد علي ماراح تسمع من " وينك ؟؟ و وراك تأخرت ؟؟؟ وجب لي وعطن ..... وخلافه " لأني بس أبيك محرم

وزواجنا زواج Friend وما فيه التزامات ] ...

<<< إيقال إني إغراءات (طراهــ عيال الحين يخافون من شي اسمه التزام و مسؤولية "تراي قلت عيال وماقلت رجال لان الرجولة ماهي بنوع الجنس) ــ على طاري نوع الجنس وحده تقول إن أخته الصغيرة مابحياته شافت ولد كما خلقه ربي ,, ومرهــ جارتهم حطت ولدهــ الصغيرون عندهم لان عندهــ مشوار ,, الزبدهــ تقول اني يوم غيرت لهُ طارت عيون أختي وقالت: ياحرام طلع له صعرور ــ


... انتهى الإعلان ...

:+:+:+:+:+:

قعدت كم يوم أتحرى احـــــــد يضيفـــن

ويوم قربت افقد الأمل جان طلب أضافه

قبلت وأنا مب مصدقه

طلع واحد فاضي شاف إعلاني وحب يستهبل ويتأكد من سلامة قواي العقلية

وكثروا ألي يستهبلون وصرت خبيرة بالحظر والحذف

مر أسبوع وبعدهــ أسبوع وقربت افقد الأمل وإن البعثة خلاص طارت بين يديني لان اسمي نزل مع المقبولين ولازم أدبر المحرم بأقرب فرصه

وبيوم جتن أضافه من واحد جدي

يقول إن حالته المادية دمار وراتبه 1500 ريال يالله تكفيه بنزين ,,, ووجبه غداء يختمه بلبن أما العشاء فهو شابورهــ بشاهي ,,ويوم ارتفعن الأسعار صار يصوم يوم ويفطر يــــوم اقتداء بداوود ــ عليه السلام ــ وترك اللبن والشابوره والبطر ومشاهــ بماء

(إلى على طاري اللبن قبل يومين كنا نتسوق ومرينا قسم الأجبان كان فيه عرض مغــــــري وهو ثلاث علب جبن مثلثات ــ أمهات 16 حبه ــ مغلفات مع بعض ومكتوب عليهن عرض ــ ملاحظه العرض من شركة الأجبان ,, يعني مب من نمونة أمهات شطرطون ــ مكتوب بالعرض إنهن مع بعض بـــ 12 ريال فقــط ,, ويوم ناظرت ولاهــ وبالأساس العلبة الوحدة بــ 4 ريال بدون عرض ,, قعدت احسب بمخي وقلت 3×4 = 12 , , يعني وين العرض؟؟؟ إلي يدعون أنهم يرعــــونــــه << بري لله تراي كاتبتها صـــــح وما غلطت بالإملاء ,, فلحد يتميلح و يقول وراتس كتبتي اسم الجبن ,, وان يرعونه قريبه لكلمة مرعــــــــى همن يفتح مخه ويتذيهن علي ويجمع الكلمة )

وبين لي بعد انه مستعد يتزوجن و يروح معي ,, وإن وده يتفرج على العالم ويغير جو ,, و زواجه بي راح يوفر له عيشه أحسن بفرجه و وسعة صدر وكل هذا ببــــــلاش

عطيته رقم جوال الوالد وتمت الخطبة و العرس

وسافرنا أنا ادرس وهو يتسكع لان على حد قوله ما يحب الدراسة ولا يدانيه

كان اتفاقنا إننا زي الإخوان وأصدقاء وبـــــــــــس

ومتى ما رجعنا نتطلــــق ,, وكلن يروح بحال سبيله ,, لان وش يخلين أتمسك بإنسان ماعندهــ طموح << طراهــ ما استغل الفرصة وطور من نفسه بهــالغربة (تراي ما المح ابد للحريم ألي يسافرن مع أزواجهن ولا يستغلن غربتهن بشي ينفع ,, بدال زنهن بقولة متى نرجع)

يتبع.......................... ............

تااااااااااااابع.............. .............




أول ماوصلنا هناك استغربت وين الواجهة البراقة لحياتهم ألي بعقولنا ؟؟!!! ....كنت أتخيل إنهم بطرانين ومطخطخين فانصدمت بحالتهم المادية التعبانة , تصدقون بناتهم كانن يدرسن معنا لحد العصر بعدهــ يروحن طوالي لشغلهن لان لازم يوفرن فلوس معيشتهن,, يشتغلن ومن ثم يرجعن لبيوتهن او يروحن لبار او أي شي يلهيهن و يقظن هناك ساعتين ومن ثم يرجعن لبيتهن ينامن ويقومن الصبح يروحن للجامعه,,حتى الملابس تشيرتين وبنطلونين جنز يلبسنهن طول السنة حتى اني اقدر أعد نمش جسمهن من تحت البلوزة <<بلاهــ من كثر ما كرفنه وانهرا ...

أما الترابط الأسري ما هناش ,, الأهل ما يدرون عن عيالهم والعكس ,, أو عن الظلم وأخاف تقولون منب دقيقه,,, فيه بعضهم يزورون أهاليهم كل كم شهر أو كل كم أسبوع ,, تدرون ماعلينا منهم لان لهم عيشتهم ولنا عيشتنا وبصرهم يعلقون مالنا دخل بهم...

بس الي يقهر ضرايبهم تقصم الظهر ,,, لان مافيه شي نشتريه هناك إلا ويقابله ضريبة لدرجة إني صرت اكتم العطسه ليقولون ادفعي ضريبة عطستس (على طاري العطسة قريت قبل كم يوم إن كتم العطسة سبب من أسباب الشلل النصفي حمانا الله وأيكم منه وعافا من ابتلي ,, فما مدى صحة هذا الخبر؟؟؟)

حياة صراحة حمدت ربي على بلدي وأهلي ودينــــي ــ الي اوجب على الأهل والزوج الصرف علينا حتى لو كنا ميسورات مادياً ــ لان مالهم مثيل هن و الأمان الي عشته بديرتي والي ماحسيت به إلا بعد سفرتي ,, لأننا هناك متى ما صار مسيان سكرنا على أرواحنا بالبيت ولا عاد نطلع

مرت الأيام وكل يوم عن يوم يزود حنيني لأهلي وناسي

والمشكلة إن زوجي صارت طلعاته كثيرة ... ينام إذا كنت بجامعتي وإذا جيت طلع

أخر شي اكتشفت انه يعــــاقر الخمر ــ والعياذ بالله ــ وحالته تتردى يوم عن يوم ...


يعني سندي بهالغربه ابتدئ يتزعزع لان زي منتم عارفين المراد من المحرم سند وعزوهــ لنا


بيوم دخل علي زوجي سكران وحالته حاله وشكله نسى اتفاقنا ,, وتحولت تقريبا من ذاك اليوم لــــ(سمــــكه)

ما أتسذب عليكم وأقول إني معترضة على حياة السمك لأن هذا من حقه ومن حقي بعد أكون نظيفة (تعرفون النظافة من الإيمان,, وخاصة إن الواحد بالغربة ماعندهــ شغله تقريبا من بعد غروب الشمس لحد شروقه غير المطافش بهالماء)

بس ألي اعترض عليه ما آلــــــت له حالته

حملــــــت

إيه حملت بطفل هــالمرة وليس مادهــ

ولحد منكم يقول وراتس يالخبله ما أكلتي موانع ,, لان الظاهر إني يوم بديت أكلهن مالحقت على منعه لأنه كـــد صـــار وزي ماقلت لكم ,كل شي تــــم على حين غــــرهــ

أما هو فما كان بوعيه ,, وحتى لو كان بوعيه خبركم رجالنا يحسون إن فيه خدش لرجولتهم لو استعملوا هـ الموانع

(صورهــ حرمه أنظرت من هن وتدهورت حالته الصحية وزوجها رافض يساعد ومصر بنفس الوقت بأنه مايبي عيال زيادة ,,, ولازم أتدبر عمرهــ أو يعرس عليه )

صارت مشاكلنا كل يوم عن يوم تزيد , وبدال ما يكون لي عون صرت أعيله وأسانده وأُوجِهه وانصحه تأخرت بدراستي وتقريبا بشهري السابع جاء وقت الإجازة السنوية وصار نقدر نرجع لديرتنا


ولدت وجبت ولـــــد والحمد لله أبشركم تمت الولادة على أحسن ما يكون وأنا ووليدي بصحة وسلامه لأن جدتي هي إلي ولدتن ومارحت لمستشفيات

أما زوجي فراح يطلع من مستشفى الأمـــــــــل الأسبوع الجاي

وتوي ما بعد قررت وش أسوي معه ,, وهل نرجع علشان أكمل دراستي أو ماذا؟؟؟؟

ألي اعرفه إني ضيعت مشيتي ومشيت الحمامة,,, لا أنا ألي تزوجت واستقريت بزواج صحيح مبني على بنيــــان متيــــــن

ولا أخذت شهادة وصرت بدال ناهــــد

إيه بغيت أنسى من رجعتي وأنا متأكدة من صحة قرار اتخذته وهو أبغير اسمي بأي شكل لأني أحسه هو السبب الرئيسي لوضعي الحين ويمكن متى ما غيرته تتعدل أموري


جبنا واسطة ويالله بطلعة الروح اقبلوا يغيرونه و أعلنت بالجريدة عن تغييري لاسمي بحيث أي احد يطالبن بقضية أو ودهــ يعترض على تغييرهــ يجي يعترض

وقبل أمس بس تمت الموافقة على تيديل اسمي وغيروهــ بالأوراق الرسمية


عاد من الفرحة ذبحت ثلاث ذبايــــح ,, ثنتين نويتهن عقيقه لولدي ,, ووحدهــ بمناسبة تغيير اسمي ,, لان كل معارفي رافضين ينطقون اسمي الجديد ألا وهو (......) إلا بذبيحة

عــشــيناهــــــم

وبعد ماغسلوا أيديهم ,, ونقشوا أسنانهم

جوا لمي وقالوا: " انعــم الله عليـــتس يـــا أحـــــــــــــــــــلام






ـــ ملاحظه كبر رأس ولد جيراننا حمني :

لا يجي واحد قليل عقل (وما يشوف ابعد من خشمه)ويفهم إن موضوعي دعوهــ لــــسفـــــر الفتايات وأبتعاثهن دون محرم ,,, لاني بذاك الوقت أحب اقـــــــر بأذنه (يعني اخفت بأذنه)إن البصيرة عندهــ مـــــــاش مب مضبوطة ويبي له يقص نظارات لمخه ومن ثم يرجع يقرءا الموضوع زين (طراهــ إن عمى البصيرة أعظم من عمى البصر الله يحمينا وإياكم منهن)




منقوووووووووول

رووووووووووووووووووووووووووووووووووووعه

كوميديه ومأسااويه بنفس الوقت ...

تسلمين يالغلاااااااااااااااااااااااااا ....

يعطيك العاااااااافيه عالمرووووووووووووووووووووووووووووووووووور

ههههههههههههههههههههههههه
قصة روعه بس كل شوي تطلع من الموضوع تدخل بشي ثاني وبعدين ترجع له
مشكوره زوزو على اللطش المبدع

مشكورة على القصة مرة حلوة الله يعطيكي العافية

الله يعااااافيك